【官宣】狼队炒领队　苏斯克查成下任主帅大热

狼队喺英超4连败，目前排联赛榜尾2位置，降班危机严重，加上近期差劣嘅纪律问题，周日(15日)会方官宣辞退领队加利奥尼尔。狼队周六(14日)对叶士域治一仗，前曼联领队苏斯克查就喺球场现身，即时疯传佢将接狼队帅印，更被博彩公司列为下任领队大热。

苏斯克查自2021年离开曼联后，至今一直未有落班，佢曾拒绝丹麦国家队同挪超母会莫迪嘅聘约，今场突然现身狼队主场，据报系同叶士域治领队、昔日喺曼联嘅助教基兰麦坚拿见面，但佢同时亦有同狼队助教倾偈，喺狼队呢个风头火势时刻，“苏B”出现自然火上加油。

博彩公司BET VICTOR，已将苏斯克查列为2倍嘅“下任狼队领队”顶头大热。如果苏斯克查执教狼队，加上云尼斯达莱(李斯特城)同基兰麦坚拿(叶士域治)，英超嘅“曼联系”领队将日益壮大。