曼城“狗急跳墙”　竟然想签普巴

曼城今季成绩大倒退，好大程度上因为主将洛迪卡斯简迪长期养伤，中场失去1位负责串联工作嘅关键人物，盛传“蓝月亮”将于下月转会市场重开后增兵，继睇中般奴古马雷斯、苏比文迪之后，依家再传出有兴趣签入前曼联中场保罗普巴。

根据英国《独立报》爆料，曼城难以喺季中抢走纽卡素中场般奴古马雷斯、皇家苏斯达中场苏比文迪，因而考虑向自由身球员保罗普巴埋手，并开始了解佢嘅近期状况。

事实上，领队哥迪奥拿曾经表示自己系普巴嘅球迷，非常欣赏呢位31岁法国国脚。普巴早前同祖云达斯解约后，可以随时加盟其他球队，哥帅希望趁机签入佢。普巴日前喺社交网上载3个emoji图案，似乎暗示有新着落，令人联想可能同曼城倾掂数。

保罗普巴效力曼联期间，上阵233场入39球及48次助攻，舆论认为只要佢专心踢波，绝对1位高质素球员，有能力帮到曼城。不过，普巴服食禁药一案嘅停赛令，要等到明年3月先至届满，即使曼城签入佢，恐怕远水救唔到近火。