曼联捉“内鬼”　加拿祖细佬疑为泄密元凶

曼联日前喺“曼市打吡”2比1反胜曼城，领队鲁宾艾摩廉嘅大胆排阵受到赞扬，不过胜仗就被“泄密风波”阴霾笼罩，球队正选阵容喺赛前1晚就被公开。据报艾摩廉已展开“捉鬼”行动，两名球星曾被调查，而阿根廷国脚阿历真度加拿祖嘅细佬，就被指系军情外泄元凶。

曼联对曼城嘅正选11人，比上场欧霸杯作出4个变动，而且位置亦有更改，好似马沙拉奥由右中坚变成右翼卫，原本阵容应该喺赛前75分钟公布，但比赛前一晚，《曼彻斯特晚报》记者Samuel Luckhurst就喺社交网公开阵容，而且人选同位置都100%准确

英国《太阳报》报道，艾摩廉已展开“捉鬼”行动，包括对阿历真度加拿祖同阿密特迪亚路进行调查，睇下佢哋有冇直接或间接泄漏球队军情，而结果系“艾摩廉庆幸冇球员直接向外泄密”。事实上早喺摩连奴执教年代，曼联已有军情外泄问题，但情况冇依家咁夸张。

传闻“泄密风波”元凶，其实系加拿祖嘅细佬罗拔图，之前多个爆料KOL都同罗拔图有联系，而且罗拔图亦好热衷喺网上评论各足球事件，包括力撑前领队坦哈格、讽刺利物浦请施洛“以为呢个光头可以令加普跑快啲”等等，言论颇具争议性。

艾摩廉喺赢曼城之后，亦曾就军情外泄问题作出暗示：“我知道呢个故事(正选阵容流出)，但我唔知点解，军情外泄问题冇得解决，因为球会有好多人，球员可以同经理人或者朋友讲，冇办法追查，比赛都要继续踢，就睇吓下一场会唔会有正选名单流出。”