梅迪历离奇消失　传药检失败面临长期停赛

车路士近期状态大勇，喺各项赛事取得7连胜，不过乌克兰翼锋梅迪历自月初对维拉有份做后备(未落场)，近4场比赛都冇进入大军名单，甚至连操练都见佢唔到。据乌克兰传媒爆料，梅迪历喺10月底一次药检“肥佬”，依家正等候第2次药检结果，如果发现曾服用禁药会面临长期停赛。

乌克兰著名记者Ihor Tsyhanyk日前暗示：“老实讲，记者经常有内幕消息，但最好等官方公布。呢一刻，我相信下星期(今周)所有人都会谈论梅迪历。”据网站《Tribuna》爆料，梅迪历喺10月底药检验出有禁药成份，而B样本将会喺短期内作出化验。

现年23岁嘅梅迪历，上年1月由萨克达加盟车路士，转会费连奖金条款高达1亿欧元，不过佢加盟后表现令人失望，上季只有5个联赛入球，今季英超7次上阵亦未开斋。车路士上场赢宾福特赛前，领队马利斯卡交代伤停名单，只系简单话“梅迪历未能候命”，未有交代详细原因。