耶馬足踝受傷抖1個月　驚步法迪殞落後塵

巴塞隆拿近期成績低落，上場聯賽輸畀雷加利斯外，更有天才翼鋒拉明耶馬傷出。巴塞周二(17日)證實耶馬右腳足踝韌帶受傷，將要休息3個星期至1個月，由於同一位置短期內已兩次受傷，令球迷擔心耶馬會變「安素法迪2.0」。

耶馬喺上月初歐聯比賽中，右腳足踝受傷抖咗3個星期，復出後頻頻助攻表現唔差，但上場再次觸傷舊患，巴塞聲明證實佢足踝韌帶受傷，要抖3個星期至1個月，嚟緊榜首大戰對馬德里體育會未能候命，最樂觀都要下月西超盃對畢爾包先可復出。

耶馬依家只係17歲，但已為巴塞踢過超過70場比賽，又為西班牙國家隊上陣17次，令人擔心佢會因為虛耗過度而出現更多傷患，情況就好似安素法迪5年前喺巴塞上位，17歲就成為球隊主力兼入選國家隊，結果連場大傷患，令依家只得22歲嘅安素法迪極速殞落。