耶马足踝受伤抖1个月　惊步法迪殒落后尘

巴塞隆拿近期成绩低落，上场联赛输畀雷加利斯外，更有天才翼锋拉明耶马伤出。巴塞周二(17日)证实耶马右脚足踝韧带受伤，将要休息3个星期至1个月，由于同一位置短期内已两次受伤，令球迷担心耶马会变“安素法迪2.0”。

耶马喺上月初欧联比赛中，右脚足踝受伤抖咗3个星期，复出后频频助攻表现唔差，但上场再次触伤旧患，巴塞声明证实佢足踝韧带受伤，要抖3个星期至1个月，嚟紧榜首大战对马德里体育会未能候命，最乐观都要下月西超杯对毕尔包先可复出。

耶马依家只系17岁，但已为巴塞踢过超过70场比赛，又为西班牙国家队上阵17次，令人担心佢会因为虚耗过度而出现更多伤患，情况就好似安素法迪5年前喺巴塞上位，17岁就成为球队主力兼入选国家队，结果连场大伤患，令依家只得22岁嘅安素法迪极速殒落。