英格蘭走寶　盧卡文當選非洲足球先生

今年非洲足球先生出爐，效力意甲球隊阿特蘭大嘅尼日利亞國腳盧卡文首次獲此殊榮，呢位出生於英國嘅27歲前鋒曾希望代表英格蘭，但被前主帥修夫基拒於門外，結果轉投尼日利亞，並大踢爭氣波，現時成為非洲一哥，英格蘭真係走寶。

盧卡文上季為阿特蘭大各項賽事上陣45場入17球，包括上屆歐霸盃決賽上演「帽子戲法」入3球，協助阿特蘭大以3比0擊敗利華古遜，奪得冠軍，並於今年2月率領尼日利亞打入非國盃決賽，但不敵科特迪瓦，屈居亞軍。

盧卡文喺球會及國際賽都有神勇表現，當選今年非洲足球先生，絕對實至名歸，亦係繼上年域陀奧森漢之後，連續2年由尼日利亞球員獲此殊榮。

盧卡文嘅父母係尼日利亞人，佢喺英國出世，曾經為英格蘭U19、U20及U21上陣，並協助「幼獅兵團」奪得2017年世青盃冠軍，滿以為能夠晉身大國腳，因而多次拒絕尼日利亞足總邀請，希望獲得前英格蘭領隊修夫基徵召，但卻未如願，2年前決定改為代表尼日利亞，現時證明佢決定正確。