朗拿度競選巴西足總主席　拯救森巴足球

巴西傳奇射手朗拿度宣布，將會參加競選巴西足總主席，拯救近年陷入低谷嘅「森巴兵團」，並獲得羅馬里奧等名宿支持，「大哨」有望繼成為球會班主之後，事業再上一層樓。

朗拿度接受葡萄牙媒體《Globo Esporte》訪問時確認要競選巴西足總主席：「足球係我嘅生命，我要重振巴西足球，重新獲得世界尊重。」現年48歲嘅朗拿度球員時代曾為巴西國家隊上陣98場入62球，協助「森巴兵團」奪得2屆世界盃及2屆美洲國家盃冠軍等錦標，自己亦當選過3次世界足球先生及2次金球獎，屬於球壇史上最偉大球員之一。

「大哨」掛靴後並冇從事教波工作，專注做老闆，現時係西甲球會華拉度列班主，依家想做埋巴西足總主席。下屆巴西足總主席選舉將於2026年2月或3月舉行，朗拿度仲有唔少時間拉票，另1位巴西傳奇前鋒羅馬里奧已率先表態支持佢，羅馬里奧退役後從政，擁有龐大政商界人脈，有佢力撐，「大哨」勝算大增。