打動艾摩廉　馬古尼自爆將續約

曼聯中堅哈利馬古尼曾因為表現欠佳，近年經常被指會被出售，但呢位31歲英格蘭國腳頂住壓力，大踢爭氣波，新帥魯賓艾摩廉亦感到滿意。馬古尼聲稱同紅魔鬼傾緊續約，好大機會留隊。

哈利馬古尼上場英超「曼市打吡」一夫當關，瓦解曼城多次攻勢，當隊友海倫同對手基爾獲加發生衝突時，挺身而出保護海倫，盡顯老大哥本色，網民紛紛指馬古尼比般奴費南迪斯更加有隊長風範。

曼聯管理層對哈利馬古尼改觀，計劃同佢續約，馬古尼承認確有其事：「我仍未續約，畢竟仲有1年合約，大家有各自選擇，但目前各種迹象非常積極，我哋商討續約進展良好。」除咗哈利馬古尼之外，曼聯亦準備同近期表現大勇嘅翼鋒阿密特迪亞路續約。