阿仙奴落重本增強火力　睇中韋斯咸翼鋒

阿仙奴近期喺英超接連失分，進攻力不足係最大原因，據報佢哋為解決呢個問題，準備喺1月「落重本」招兵，目標係韋斯咸嘅加納翼鋒古度斯，預計轉會費要8,500萬鎊。

24歲嘅古度斯係英超「扭波王」，佢上年效力阿積士嗰陣，阿仙奴已經想簽佢，不過因財政公平條例未成事，最終被韋斯咸搶走。據《talkSPORT》報道，古度斯明年夏天合約內8,500萬鎊買斷條款將會生效，但如果有球會喺1月份支付相若價錢，韋斯咸亦會樂意放人。

報道指阿仙奴為增強火力，有意羅致呢位翼鋒，不過阿仙奴可能要「先賣後買」，傳聞李安度杜沙特會被出售，騰出空間進行古度斯嘅收購行動，而紐卡素亦對呢位加納翼鋒虎視眈眈。