「耶穌」復活連中三元　阿仙奴反勝水晶宮

周四(19日)凌晨英聯盃8強，阿仙奴前鋒加比爾捷西斯終於迎嚟大爆發，連中三元帶領球隊3比2反勝水晶宮殺入4強。綽號「耶穌」嘅捷西斯，成個2024年只為阿仙奴入過2球，今仗入波已多過全年總和，聖誕節前「復活」對阿仙奴嚟講係及時雨。

阿仙奴今場半力出戰，開波4分鐘就因積及基奧柯解圍漏油，被桑馬迪達率先攻陷。阿仙奴之後發動狂攻，史達寧曾近射中楣，54分鐘捷西斯禁區內巧妙騙過對手，再喺門將出迎嗰陣乖巧笠入，阿仙奴追平後氣勢如虹，捷西斯再喺73分鐘同81分鐘入波「戴帽」，水晶宮85分鐘憑尼基迪亞破蛋，無阻阿仙奴贏3比2。

阿仙奴近期被批評「生波」入球能力不足，而捷西斯今場3個入波都好精彩，領隊阿迪達賽後表示：「呢場波對捷西斯好重要，佢一直努力嘗試，而且並唔係為自己入波，而係為球隊奉獻所有，3個美妙時刻為球隊帶嚟勝利，證明佢對球隊嘅重要性。」