韋斯咸惡運未除　盧比迪古返西班牙奔喪

英超球會韋斯咸周三(18日)宣布，領隊盧比迪古嘅爸爸不幸過身，呢位西班牙教頭已返國奔喪，球會操練暫時由助教代勞，消息指盧比迪古希望趕及周六(21日)迎戰白禮頓前，飛返倫敦親自領軍。

韋斯咸證實盧比迪古嘅爸爸周二(17日)因病去世，享年94歲，盧比迪古已飛返西班牙處理爸爸身後事，發言人表明未知盧比迪古會幾時歸隊，但該西班牙主帥希望喺下場聯賽對白禮頓前返嚟。

韋斯咸近期惡運連連，早前有米查利安東尼奧嚴重車禍入院，上星期又有U15門將新星奧斯卡發現患上罕見腦癌，近期備受壓力嘅盧比迪古依家又丁父憂，令球會上下一片愁雲慘霧。