韦斯咸恶运未除　卢比迪古返西班牙奔丧

英超球会韦斯咸周三(18日)宣布，领队卢比迪古嘅爸爸不幸过身，呢位西班牙教头已返国奔丧，球会操练暂时由助教代劳，消息指卢比迪古希望赶及周六(21日)迎战白礼顿前，飞返伦敦亲自领军。

韦斯咸证实卢比迪古嘅爸爸周二(17日)因病去世，享年94岁，卢比迪古已飞返西班牙处理爸爸身后事，发言人表明未知卢比迪古会几时归队，但该西班牙主帅希望喺下场联赛对白礼顿前返嚟。

韦斯咸近期恶运连连，早前有米查利安东尼奥严重车祸入院，上星期又有U15门将新星奥斯卡发现患上罕见脑癌，近期备受压力嘅卢比迪古依家又丁父忧，令球会上下一片愁云惨雾。