拉舒福特獲解凍　周日復出成最後救贖機會

曼聯前鋒拉舒福特近2場賽事，被踢出大軍名單，引起將帥不和疑雲，並盛傳佢將會離隊。不過，根據領隊魯賓艾摩廉最新透露，呢位27歲英格蘭國腳將會出戰周日(22日)晚英超主場對般尼茅夫，可能成為佢最後救贖機會。

拉舒福特缺陣上輪英超「曼市打吡」對曼城及上場英聯盃8強對熱刺，加上佢早前接受訪問時，表示準備好接受新挑戰，離隊傳聞不脛而走，甚至令人懷疑，佢因為紀律問題，被領隊魯賓艾摩廉「雪藏」。

不過，呢位葡萄牙少帥透露「福仔」並冇做出違規行為：「拉舒福特並冇紀律問題，我揀選球員參加比賽，係根據佢哋操練表現，並唔係紀律等原因，拉舒福特周日當然可以上陣。」

拉舒福特今季各項賽事上陣24場入7球，經常被批評表現欠積極，曼聯今年僅餘下3場比賽，包括英超對般尼茅夫、狼隊、紐卡素，如果「福仔」演出繼續冇改善，下月轉會市場重開後，可能被出售或者外借去其他球隊。