港超聯　聯賽第2勝！港會挫10人冠忠南區

「中銀人壽香港超級聯賽」周日（22日）獨腳戲，港會坐鎮香港足球會足球場迎戰冠忠南區。最終港會憑薩拉沙一箭定江山，以1比0擊敗早段有基哥利被逐的南區，取得今季聯賽第2勝，兼升上第7位。

有羅素缺陣的主隊，改派唐道碧及黎皚韜鎮守中路，峇夏比負責掃蕩，關歷克於前線爭取入球；至於南區，佐佐木周和趙聡悟負責派牌，支援基哥利、艾華和史提芬彭利拿攻堅。

開賽僅9分鐘，南區就收到壞消息，基哥利出手打中比提，球證到場邊觀看VAR後，向基哥利出示紅牌，客隊10人應戰。其後主隊佔據較多控球，28分鐘，峇夏比眼見冇南區球員壓迫，嘗試遠射中柱彈出。42分鐘，港會有個黃金機會，黃琛喆左路窄位抽射，被伍瑋謙救出，史加利補射「撻Q」，3分鐘後，黃琛喆左路傳中，翟廷峯頭槌解圍不遠，薩拉沙勁射破網，港會領先1比0完半場。

南區換邊後一口氣換入積遜和黎格爾，力圖平反敗局，戰至下半場中段，艾華接應界外球後，壓入禁區起腳，被唐道碧擋出底線，67分鐘，佐佐木周罰球傳入禁區，黃浩然在薩拉沙力壓下射高。隨後佐佐木周禁區內被黎皚韜推跌，球證到場邊觀看VAR後改判12碼，但佐佐木周操刀中柱彈出。下半場補時階段，黃浩然接應積遜罰球頂中柱，最終港會維持勝局，贏1比0完場，收穫今季聯賽第2勝，兼反壓標準流浪升上第7位。

南區主教練楊正光賽後表示，球隊下半場射失12碼，形容落敗比較欠運，基哥利早段被逐令球隊陷於苦戰，往後會勸導基哥利控制好情緒：「我唔覺得基哥利嗰動作，會構成紅牌，只可以叫大家喺VAR幫助執法之下，要踢得聰明啲，不過基哥利一直以嚟都唔太控制到脾氣，呢點要同佢傾吓。」

南區以第6位完成2024年，「光Sir」承認成績未如理想，盼來年有所改善：「球隊表現時好時壞，希望下年可以維持高水平演出，不過我哋季中暫時唔會有新兵。」談到球隊會否為來年「省港盃」，向港隊放人，「光Sir」指港隊未與他們聯絡，但只要代表隊有需要，會「絕對支持」

港會主教練谷卓斯則大讚球隊，上半場表現出色，最終得以全取3分，為今年寫上完美句號：「上半場真係踢得好好，雖然換邊之後南區射失過12碼，確係贏得有啲好彩，但可以用贏波，完結2024年係值得高興嘅，而且班後生仔練波有好表現，我哋都好肯畀佢哋上陣，希望大家繼續進步。」此外，他又透露已簽下上季效力港會，上半季曾投效均業北區的中堅費利皮爾。