拉舒福特閃電被飛　慘成曼聯「孤獨精」

英格蘭前鋒拉舒福特早前宣稱準備離開曼聯，事業可能出現重大轉變，原來佢嘅情路亦遇上打擊，據報拍拖冇耐嘅真人騷女星姬絲(Grace Jackson)，最近「狠飛」拉舒福特，因為覺得佢對待呢段戀情唔夠認真。

英國《太陽報》報道，同拉舒福特拍拖唔夠半年嘅姬絲，最近主動提出分手，佢身邊朋友透露：「姬絲覺得拉舒福特唔夠認真，對呢段關係只不過玩玩下，姬絲知道冇未來後決定斬纜，佢已經喺IG取消關注拉舒福特。」

球場同情場都失意，報道指拉舒福特最近嘅離隊宣言，亦引嚟部份隊友不滿，消息人士指出：「贏曼城之後全隊都好興奮，球員唔明點解拉舒福特要揀呢個時間做聲明，其實自從保羅普巴同連格離隊，佢喺曼聯都冇乜親密好友，平時都好靜，冇做到領袖嘅角色。」