鄰居幫到手！「零封王」愛華頓令車仔失分

利物浦喺英超穩坐「1哥」位置過聖誕，好鄰居愛華頓功不可沒，佢哋上場0比0悶和阿仙奴後，周日(22日)再喺主場0比0守和車路士，令利物浦兩大勁敵接連失分。車路士領隊馬利斯卡賽後大讚愛華頓防守，表示和波都收貨。

車路士今場控制戰局，但面對愛華頓嘅銅牆鐵壁束手無策，下半場愛華頓加強反擊力度，多次令車仔門前風聲鶴唳，最後0比0握手言和。愛華頓近6場聯賽有5場保持不失，而且連續兩周令阿仙奴同車路士失分，利物浦真係多謝晒佢哋。

車仔領隊馬利斯卡賽後表示：「我好開心，比起上星期贏賓福特更開心，愛華頓係支好難搞嘅球隊，佢哋保持不失球嘅能力係全歐洲最強5隊之一。我哋嘅防守今場都表現得好好，我戥佢哋開心。」