蘭斯達爾特製「4指手套」　修咸頓靠晒佢

排英超包尾嘅修咸頓，周日(22日)作客0比0守和富咸，成功終止4連敗走勢。傷愈復出嘅門將蘭斯達爾居功至偉，而佢今場所用嘅特製「4指手套」，更成為球迷熱話。

蘭斯達爾今夏由阿仙奴轉投修咸頓，但上個月因為手指骨折，缺陣咗對上5場聯賽，而修咸頓喺呢5場波只得1分，合共失咗15球，連領隊羅素馬田都被炒魷。

今場對富咸，蘭斯達爾就提前復出，而佢左手嘅手套就經過特別設計，中指同無名指「二合為一」，變成一隻只得4隻手指位嘅手套。

蘭斯達爾表現未受影響，全場作出5次撲救，包括救出伊禾比嘅妙射，為修咸頓保住清白之身，搶到寶貴1分。