英超生涯倒數　富明尼斯證實斟李察利臣回巢

熱刺前鋒李察利臣喺英超打滾第8年，不過近兩季事業極速下滑，據報佢亦打算離開尋求新發展，巴甲球隊富明尼斯會長證實，佢哋已經向熱刺提出斟介，希望得到呢位27歲前鋒回巢。

李察利臣喺富明尼斯成名，2017年登陸歐洲加盟屈福特，之後轉會愛華頓再去熱刺，不過2022年加盟熱刺後表現差勁，加上傷患不斷，轉會至今只得12個英超入波，上月又因大腿筋嚴重受傷休戰，而且復出無期，傳聞熱刺將喺1月買前鋒頂替。

曾承認有心理問題嘅李察利臣，似乎亦鳥倦知還，富明尼斯就想將佢收歸旗下，會長比頓確特表示：「熱刺話佢哋歡迎球會開價(買李察利臣)，但呢刻唔考慮放人，我哋亦同李察利臣方面傾緊，睇下佢有冇興趣返富明尼斯。」