拉舒福特「造反案」　艾摩廉稱有「幕後黑手」

曼聯前鋒拉舒福特早前接受訪問，公開表示準備接受「新挑戰」，暗示想離隊，令佢同領隊魯賓艾摩廉嘅關係跌至谷底。不過，呢位葡萄牙名帥似乎想為事件降溫，最新表示可能有人教唆「福仔」轉會，直指其經理人團隊係「幕後黑手」。

拉舒福特已連續第3場被踢出曼聯大軍名單，令人懷疑佢將於下月轉會市場重開後離隊，魯賓艾摩廉認為「福仔」未必真係想走人：「佢喺訪問中話想接受新挑戰，但你要明白，好似拉舒福特呢種級數嘅球星，經常被一大班人圍繞住，好多時球員作出選擇或者想法，並非來自佢本人，我一定會幫助拉舒福特及隊內任何球員解決困難，但佢哋都要做應該做嘅事，我知唔只拉舒福特1位球員接受類似訪問。我作為領隊，只會睇球員操練及比賽表現，其他問題交由球會處理。」

艾摩廉仲話已經忘記拉舒福特喺訪問中所講嘅內容，似乎想畀機會佢重新振作。據悉曼聯董事局全力支持艾摩廉「雪藏」拉舒福特嘅決定，佢幾時可以復出，由艾摩廉一人話事。