一個月貨仔　艾摩廉接班人將被炒

葡萄牙勁旅士砵亭自從主帥魯賓艾摩廉轉投曼聯之後，成績急插水，接手領軍嘅祖奧彭利拿執教8場比賽，法定時間僅2勝，根據「轉會權威」記者羅曼諾(Fabrizio Romano)爆料，呢位40歲葡萄牙少帥即將被炒。

祖奧彭利拿原本係士砵亭B隊教練，魯賓艾摩廉上月成「魔」後，佢獲「升職」成為一隊主帥，首仗領軍係威係勢，喺葡萄牙盃大勝FC阿馬蘭迪6比0，但之後無以為繼，一度連輸4場，包括歐聯2連敗。

士砵亭上場葡超打和0比0基維辛迪，被賓菲加反超前搶走榜首之位，由原本爭標一片光明，到現時陷入劣勢，所以會方準備盡快換帥，希望挽回頹勢。

根據葡萄牙傳媒報道，士砵亭已經有新帥人選，就係甘馬雷斯教練雷波格斯，呢位43歲葡萄牙籍教頭今季加盟甘馬雷斯，率領球隊踢15場聯賽取得6勝5和4負排第6位。