C朗痛失好拍檔　塔利斯卡加盟費倫巴治

根據「轉會權威」記者羅曼諾(Fabrizio Romano)爆料，沙特阿拉伯豪門艾納斯前鋒塔利斯卡離隊已成定局，並即將同費倫巴治達成協議，下月轉會市場重開後，加盟呢支土耳其勁旅，意味艾納斯巨星C朗痛失鋒線好拍檔。

據悉費倫巴治以先借後買方式簽入塔利斯卡，並負擔佢一半年薪，大約620萬美元(約4,800萬港元)，如果呢位30歲巴西前鋒表現達到要求，費倫巴治會正式買斷佢，提供3年合約。由葡萄牙名帥摩連奴執教嘅費倫巴治現時排土超第2位，落後榜首加拉塔沙雷8分，為咗提升攻力，下半季追分，所以簽入塔利斯卡。

塔利斯卡曾效力葡超球隊賓菲加，甚至去過中超搵食，加上踢過比錫達斯2季，對於土超並唔陌生。佢3年前加盟艾納斯，各項賽事上陣110場入77球，包括今季19次披甲入8球，佢離隊之後，艾納斯可能會收購球星保持實力。