曼城救星到　「新美斯」下月歸隊

曼城近期成績令人慘不忍睹，射手艾寧夏蘭特腳頭無靈，盛傳下月轉會市場重開後將增兵，唯一肯定係有「新美斯」之稱嘅18歲阿根廷進攻中場艾捷華利，將於下月正式歸隊，或者可以解燃眉之急。

曼城早於今年1月已經斥資2,350萬歐元(約1.9億港元)向阿甲勁旅河床收購艾捷華利，雙方簽約4年半，但先將佢外借畀河床1年，下月借用期屆滿，將會正式向「藍月亮」報到。艾捷華利周一(23日)透過視象，同河床球迷告別，將飛去曼徹斯特，參加曼城操練，預料領隊哥迪奧拿會將佢加入歐聯名單。

艾捷華利喺2023年世少盃打出名堂，以阿根廷U17隊長身份上陣7場入5球，代表作一定係8強對巴西U17上演「帽子戲法」，協助球隊大勝3比0，可惜阿根廷喺4強被德國淘汰。

艾捷華利今年各項賽事上陣41場射入4球及6次助攻，雖然佢身高只有1米70，但腳法細膩，有球王美斯影子，被認為係阿根廷國家隊未來核心。艾捷華利下月加盟曼城後，能否協助球隊走出低谷，大家拭目以待。