拉爵入股曼聯一周年　成績大倒退

曼聯去年平安夜官方宣布拉特克利夫入股，兼接管足球部，象徵「紅魔鬼」進入新時代，一年過去，有傳媒發現曼聯現時成績，比格拉沙家族時期更差，第一年改革可以話以失敗告終。

單計聯賽成績，去年「拉爵」入股時，曼聯在英超18輪9勝1和8負，得28分排名第8，而現時曼聯在聯賽17戰6勝4和7負，得22分排第13，聯賽排名前10都不保。

如果淨計過去一年曼聯嘅聯賽成績，共計係37場獲15勝9和13負，取得54分，呢個得分在英超只能排在第8至9名之間。

照現時走勢判斷，曼聯今季要取得來季歐聯席位機會相當渺茫，甚至連歐霸同歐協聯都好忟水，如果來季繼續失去歐聯席位，根據曼聯同球衣廣告商合約協議，將會再削減1,000萬鎊贊助費(約9,700萬港元)，加埋所損失嘅賽事獎金同轉播費，拉爵呢一年來慳慳埋埋所得，都係唔夠貼。