曼城靠「太太團」振軍心　聖誕派對重現歡顏

曼城年底跌入黑暗日子，近12場比賽只係贏過1場，據報領隊哥迪奧拿趁住聖誕節，畀球員帶埋另一半一齊開聖誕派對，成功令一班失意球星重現歡顏。

曼城周四(26日)聖誕快車迎戰愛華頓前，球會舉行年度聖誕派對，哥迪奧拿亦批准球員帶埋家人出席，曼城「太太團」亦公開一系列黑白色嘅派對相片，見到奇雲迪布尼、貝拿度施華、根度簡等球星都都玩得非常開心。奇雲迪布尼同打扮性感嘅老婆Michele Lacroix全程大曬恩愛，根度簡亦摸住懷有第2胎嘅老婆Sara個大肚，一臉幸福。

不過，基爾獲加日前就爆料，指曼城喺聖誕節正日(25日)都要練波：「之前幾季我哋都有得喺聖誕節休息，同屋企人一齊過節，可惜今年拆禮物日有比賽，領隊改變咗訓練計劃，所以聖誕節都要練波。」曼城近期3連敗後，希望喺主場可以贏愛華頓重返勝軌。