曼城靠“太太团”振军心　圣诞派对重现欢颜

曼城年底跌入黑暗日子，近12场比赛只系赢过1场，据报领队哥迪奥拿趁住圣诞节，畀球员带埋另一半一齐开圣诞派对，成功令一班失意球星重现欢颜。

曼城周四(26日)圣诞快车迎战爱华顿前，球会举行年度圣诞派对，哥迪奥拿亦批准球员带埋家人出席，曼城“太太团”亦公开一系列黑白色嘅派对相片，见到奇云迪布尼、贝拿度施华、根度简等球星都都玩得非常开心。奇云迪布尼同打扮性感嘅老婆Michele Lacroix全程大晒恩爱，根度简亦摸住怀有第2胎嘅老婆Sara个大肚，一脸幸福。

不过，基尔获加日前就爆料，指曼城喺圣诞节正日(25日)都要练波：“之前几季我哋都有得喺圣诞节休息，同屋企人一齐过节，可惜今年拆礼物日有比赛，领队改变咗训练计划，所以圣诞节都要练波。”曼城近期3连败后，希望喺主场可以赢爱华顿重返胜轨。