舒克斯事業愛情「雙失」　同女友分手

荷蘭前鋒約舒亞舒克斯，今夏加盟曼聯後發展麻麻，盛傳1月有可能會被賣走，原來呢位前鋒情路同樣失意，據報佢同多年拖友Celina Jada Kerr已經分手，女方更喺社交網刪除兩人所有合照。

報道指舒克斯喺16歲效力拜仁慕尼黑嗰陣，已經同模特兒Celina Jada Kerr開始拍拖，舒克斯之後轉戰意甲，女方都有跟隨，不過今夏轉會曼聯後，Celina Jada Kerr就從未現身，而且兩人已取消追隨對方IG，近日Celina Jada Kerr更刪除兩人合照，包括以「情侶檔」拍攝嘅廣告相，分手結局相當明顯。

舒克斯今季17次喺英超上陣，但只有6場係任正選，目前只有3個聯賽入球，新領隊魯賓艾摩廉明顯更重用海倫擔任箭頭，有傳舒克斯將喺1月轉會窗被送返意甲，祖雲達斯、拿玻里同AC米蘭據報都對呢位荷蘭新星虎視眈眈。