【官宣】奧斯卡重投母會：我都賺夠啦

前巴西國腳奧斯卡杜斯山度士月初約滿離開上海海港，結束8年中超生涯，現時有新着落，正式宣布重返巴甲母會聖保羅，雙方簽約3年。

現年33歲嘅奧斯卡出身於聖保羅青訓系統，並於2008至10年為一隊效力，其後轉投另一支巴甲球隊國際體育會，2012年加盟車路士，捧過2次英超、1次英聯盃及1次歐霸盃冠軍。

奧斯卡2017年1月以6,000萬歐元轉會費由車路士加盟上海海港，轟動球壇，因為佢當時只係25歲，竟然放棄踢英超，去中超搵食，被指「自毀前途」。當佢離開上海海港後，一度傳出佢可能重投國體會，但最後選擇加盟母會聖保羅，簽約3年，年薪為2,400萬雷亞爾(約3,000萬港元)，遠低於效力上海海港嘅人工。

據悉奧斯卡效力上海海港8年，總共獲得1.92億歐元(約16億港元)薪酬，難怪網民話佢已經賺夠，想畀其他人賺下，所以重返巴西搵食。