沙卡養傷期「加長」　或借用法國前鋒

阿仙奴翼鋒布卡約沙卡上場勇戰受傷，原本指佢大腿肌肉撕裂要抖2個月，不過最新消息指呢個「時間表」只係最樂觀諗法，更大可能係要到明年3月先可以復出，傳聞阿仙奴會喺1月份增兵，有機會借用法國國腳高路梅安尼。

隨住沙卡要休戰3個月或以上，史達寧亦因膝傷要抖「幾個星期」，阿仙奴1月增兵勢在必行，據英國《標準報》報道，法甲勁旅巴黎聖日耳門(PSG)主動向阿仙奴提出，可以將高路梅安尼外借，而阿仙奴正考慮係咪正式行動。

26歲嘅高路梅安尼上年由法蘭克福轉投PSG後，一直未受重用，今季法甲10次上陣入面只得2次係正選，PSG亦決定畀佢喺1月轉會窗離隊。阿仙奴領隊阿迪達日前表示，佢依家專注喺內部尋找替補方案，包括用加比爾馬天尼利改踢右翼。