沙卡养伤期“加长”　或借用法国前锋

阿仙奴翼锋布卡约沙卡上场勇战受伤，原本指佢大腿肌肉撕裂要抖2个月，不过最新消息指呢个“时间表”只系最乐观谂法，更大可能系要到明年3月先可以复出，传闻阿仙奴会喺1月份增兵，有机会借用法国国脚高路梅安尼。

随住沙卡要休战3个月或以上，史达宁亦因膝伤要抖“几个星期”，阿仙奴1月增兵势在必行，据英国《标准报》报道，法甲劲旅巴黎圣日耳门(PSG)主动向阿仙奴提出，可以将高路梅安尼外借，而阿仙奴正考虑系咪正式行动。

26岁嘅高路梅安尼上年由法兰克福转投PSG后，一直未受重用，今季法甲10次上阵入面只得2次系正选，PSG亦决定畀佢喺1月转会窗离队。阿仙奴领队阿迪达日前表示，佢依家专注喺内部寻找替补方案，包括用加比尔马天尼利改踢右翼。