尼干古向巴塞送秋波　馬利斯卡：佢冇唔開心

車路士今季成績理想，而且陣容非常鼎盛，喺英超同盃賽可以排出兩套頂級陣容作戰，前景相當樂觀。不過盛傳法國前鋒尼干古不滿擔任「二線」角色，近日向巴塞隆拿大送秋波，似乎想另謀高就。

27歲嘅尼干古曾經係炙手可熱球星，不過上季加盟車路士後長期受傷，今季喺馬利斯卡領軍下，亦只能做尼高拉斯積遜副手，數據上雖然有25次上陣同12個入波，但當中10球係嚟自英聯盃同歐協聯呢啲「二線賽事」，喺英超只踢過2次正選。

據英國《每日郵報》報道，尼干古經理人薩哈維最近主動聯絡巴塞隆拿，睇下呢支西甲勁旅有冇興趣提出收購，不過巴塞回應只會考慮喺夏天收購，1月轉會窗唔會出手。對於尼干古離隊傳聞，車仔領隊馬利斯卡表示：「我同尼干古傾過，佢冇講過佢唔開心，當然個個球員都想有更多上陣時間，但尼干古對車路士好重要，我冇考慮過1月放走佢。」