尼干古向巴塞送秋波　马利斯卡：佢冇唔开心

车路士今季成绩理想，而且阵容非常鼎盛，喺英超同杯赛可以排出两套顶级阵容作战，前景相当乐观。不过盛传法国前锋尼干古不满担任“二线”角色，近日向巴塞隆拿大送秋波，似乎想另谋高就。

27岁嘅尼干古曾经系炙手可热球星，不过上季加盟车路士后长期受伤，今季喺马利斯卡领军下，亦只能做尼高拉斯积逊副手，数据上虽然有25次上阵同12个入波，但当中10球系嚟自英联杯同欧协联呢啲“二线赛事”，喺英超只踢过2次正选。

据英国《每日邮报》报道，尼干古经理人萨哈维最近主动联络巴塞隆拿，睇下呢支西甲劲旅有冇兴趣提出收购，不过巴塞回应只会考虑喺夏天收购，1月转会窗唔会出手。对于尼干古离队传闻，车仔领队马利斯卡表示：“我同尼干古倾过，佢冇讲过佢唔开心，当然个个球员都想有更多上阵时间，但尼干古对车路士好重要，我冇考虑过1月放走佢。”