紅魔鬼翻身機會來了　曼聯拆禮物日勝率No.1

聖誕新年快車Boxing Day正日，有8場英超賽事上演，喺普天同慶嘅日子，球員都會踢得特別爽朗，促成多入波交收，以上季為例，10場拆禮物日英超賽事，合共射入39球，有8場炮製超過兩球，當中6場總入球更係4球或以上。

至於Boxing Day表現最佳球隊，就係有復甦迹象嘅曼聯。「紅魔鬼」28次拆禮物日正日賽事贏22場，取勝率達79%，係全英超最高，上季即使喺坦哈格帶領下表現麻麻，但到咗Boxing Day對住阿士東維拉，喺半場落後0比2下，最後反勝3比2，今季拆禮物日佢哋將會作客護級分子狼隊，有望延續良好傳統。

相反，論Boxing Day最差球隊，就係紐卡素。「喜鵲」喺25次拆禮物日賽事，竟然輸咗16場，輸波率高達64%，唔知係咪東北天氣比較寒冷有影響。上季紐卡素主場以1比3不敵諾定咸森林，今季佢哋將會主場面對阿士東維拉，睇嚟都唔容易應付。