红魔鬼翻身机会来了　曼联拆礼物日胜率No.1

圣诞新年快车Boxing Day正日，有8场英超赛事上演，喺普天同庆嘅日子，球员都会踢得特别爽朗，促成多入波交收，以上季为例，10场拆礼物日英超赛事，合共射入39球，有8场炮制超过两球，当中6场总入球更系4球或以上。

至于Boxing Day表现最佳球队，就系有复苏迹象嘅曼联。“红魔鬼”28次拆礼物日正日赛事赢22场，取胜率达79%，系全英超最高，上季即使喺坦哈格带领下表现麻麻，但到咗Boxing Day对住阿士东维拉，喺半场落后0比2下，最后反胜3比2，今季拆礼物日佢哋将会作客护级分子狼队，有望延续良好传统。

相反，论Boxing Day最差球队，就系纽卡素。“喜鹊”喺25次拆礼物日赛事，竟然输咗16场，输波率高达64%，唔知系咪东北天气比较寒冷有影响。上季纽卡素主场以1比3不敌诺定咸森林，今季佢哋将会主场面对阿士东维拉，睇嚟都唔容易应付。