荷蘭少帥交鋒　雲佬食住施洛

英超榜首利物浦將於於周五(27日)凌晨主場迎戰護級份子李斯特城，2位荷蘭少帥施洛同雲尼斯達萊正面交鋒，雖然由施洛執教嘅「紅軍」實力凌駕「狐狸兵團」，但「雲佬」以前喺荷甲教波對住施洛，往績佔優，成為李斯特城製造爆冷賽果嘅希望。

現年48歲嘅雲尼斯達萊喺2022/23年球季，首次執教成年隊，擔任燕豪芬主帥，該季「雲佬」領軍兩循環聯賽遇上由施洛領軍嘅飛燕諾，取得1勝1和，燕豪芬分別主場贏4比3，作客領先2球之下，被逼和2比2，雲尼斯達萊今仗重遇呢位手下敗將，心理上有優勢。

不過，要留意該季燕豪芬屈居聯賽亞軍，「雲佬」季尾辭職，反觀施洛率領飛燕諾奪得荷甲冠軍，講到尾呢位46歲「光頭主帥」先至係贏家。