英超金靴獎有排鬥　冷敲車仔孖寶

英超「金靴獎」競爭非常激烈，當艾寧夏蘭特喺開季頭5輪狂入10球，大部分人都以為神射手殊榮喺第1個月就塵埃落定，但隨住曼城插水式沉淪，夏蘭特亦同樣出現入球荒，依家雖然仍有13球，但已落後穆罕默德沙拿兩球跌落第2位，論氣勢已經輸晒畀一眾頂級前鋒。

夏蘭特狀態低迷，相反利物浦前鋒沙拿如日方中，而且佢對上7個球季都保持極穩定入球數字，平均每季英超入超過22球，可以預期呢位埃及前鋒唔會出現嚴重跌Watt問題，1.58倍嘅神射手賠率係熱得有道理。

至於冷敲人選推薦「車路士孖寶」，高爾彭馬同尼高拉斯積遜，目前分別有11球同9球，彭馬今季試過單場入4球，而積遜貴為「車仔」首席前鋒，供應源源不絕，佢嘅把握力喺過去1年亦不斷提升，呢對「車路士孖寶」嘅入球好有保證，當中以11倍嘅彭馬最值得推薦。