查頓辛祖表現極佳　轉會費一升再升

由曼聯外借到車踏士嘅查頓辛祖，上半季表現極之出色，據報車路士季尾肯定會將佢永久買斷，轉會費亦由2,000萬鎊升到最高嘅2,500萬鎊。（約1.94億至2.45億港元）

查頓辛祖2021年由多蒙特加盟曼聯時，轉會費高達7,300萬鎊，但佢加盟後表現一般，淪為後備，甚至被國家隊除名，不過當佢離開曼聯後，例如上季外借返去多蒙特，又或今季外借到車路士，表現當堂生猛晒，只能講句曼聯唔適合佢。

雖然曼聯已經換帥，同佢不和嘅坦哈格已經被炒，但查頓辛祖應該都唔會再返曼聯，因為根據外借協議，車路士聯賽排名14位以上，就要強制買斷球員，現時車路士高踞聯賽次席，來季好大機會重返歐聯，查頓辛祖永久轉會亦相當合理。

查頓辛祖在曼聯周薪高達30萬鎊，但原來今季外借到車路士，佢本人願意降薪加盟，現時周薪大約為20萬至25萬鎊，車路士買斷佢並無太大困難，而曼聯亦可以擺脫呢個大包袱，都算係好事。