曼聯願賣加拿祖　只要求呢個價錢

曼聯鋒線醞釀大地震，除咗拉舒福特可能離隊之外，新星阿歷真度加拿祖亦面臨被出售，據悉紅魔鬼計劃將呢位20歲阿根廷國腳掛牌，只要有球會願意出價6,000萬鎊(約5.8億港元)轉會費，就可以帶走佢。

曼聯由前主帥坦哈格執教時期，採用4231陣式，加拿祖獲得重用，並有出色表現，但新帥魯賓艾摩廉慣用3421或者343陣式，令呢位翼鋒英雄無用武之地，已淪為後備，甚至被踢出早前「曼市打吡」大軍名單，即使加拿祖近2場後備上陣，表現亦令人失望。

曼聯上場對般尼茅夫，阿歷真度加拿祖錯失1次單刀入波機會，備受輿論批評，加上佢嘅傳中波質素非常低，令隊友有微言。由於曼聯新股東拉特克利夫唔想斥巨資增兵，如果艾摩廉想簽新球員，必須先出售現有球員籌集資金，加拿祖成為被掛牌球員之一，皆因佢夠年輕，可以賣到好價錢。

早前傳出馬體會有意簽入加拿祖，至於能否滿足曼聯6,000萬鎊轉會費要求，仍然係未知之數。