「樣衰」拋窒夏蘭特　比克福特做足功課

愛華頓周四(26日)英超再做「巨人殺手」，作客1比1逼和曼城，近3輪聯賽先後令阿仙奴、車路士同曼城失分。英格蘭門將比克福特今場勇救12碼成為英雄，佢喺神救前曾經向艾寧夏蘭特做出樣衰鬼臉，成功拋窒對手，而且佢事前已經做足功課，預知夏蘭特會射邊個位，認真抵讚！

曼城同愛華頓半場踢成1比1，51分鐘沙雲奴博到12碼，夏蘭特操刀被比克福特撲出。夏蘭特射12碼前，愛華頓先有史密斯高文走向騷擾而食黃牌，到夏蘭特射門前，比克福特又做出樣衰鬼臉，似乎成功拋窒夏蘭特。

除咗大玩心理戰之外，比克福特同教練團背後亦做足功課，原來佢個水樽上面貼滿「貓紙」，入面分析晒曼城球員射12碼嘅慣性，「貓紙」顯示夏蘭特有55%機會射門將右手面，呢個分析果然中到應，比克福特嘅努力並冇白費。