“样衰”抛窒夏兰特　比克福特做足功课

爱华顿周四(26日)英超再做“巨人杀手”，作客1比1逼和曼城，近3轮联赛先后令阿仙奴、车路士同曼城失分。英格兰门将比克福特今场勇救12码成为英雄，佢喺神救前曾经向艾宁夏兰特做出样衰鬼脸，成功抛窒对手，而且佢事前已经做足功课，预知夏兰特会射边个位，认真抵赞！

曼城同爱华顿半场踢成1比1，51分钟沙云奴博到12码，夏兰特操刀被比克福特扑出。夏兰特射12码前，爱华顿先有史密斯高文走向骚扰而食黄牌，到夏兰特射门前，比克福特又做出样衰鬼脸，似乎成功抛窒夏兰特。

除咗大玩心理战之外，比克福特同教练团背后亦做足功课，原来佢个水樽上面贴满“猫纸”，入面分析晒曼城球员射12码嘅惯性，“猫纸”显示夏兰特有55%机会射门将右手面，呢个分析果然中到应，比克福特嘅努力并冇白费。