杜蘭爭議食紅牌　維拉吞3蛋表明上訴

阿士東維拉周四(26日)英超作客紐卡素，喺前鋒祖漢杜蘭爭議性被紅牌趕走下，最終慘敗0比3。維拉領隊艾美利賽後批評VAR嘅執法，表明會為祖漢杜蘭提出上訴。

紐卡素2分鐘就由安東尼哥頓左路扣大位轟入世界波，32分鐘出現爭議一幕，法比安舒哈快祖漢杜蘭一步鏟走個波，但祖漢杜蘭疑似失平衡下，踩咗落法比安舒哈屁股同背脊，球證直接向佢出示紅牌，VAR覆核亦確認判決。紐卡素踢多1個後，再由阿歷山大伊沙克同祖連頓各入一球，大勝3比0完場。

英足總證實祖漢杜蘭因「暴力行為」被逐，將會面臨停賽3場，不過網民意見分歧，唔少人認為祖漢杜蘭並唔係蓄意踩人，只係高速下失平衡而唔小心踩到。維拉領隊艾美利賽後話：「停賽3場？嘩！不能接受！呢個唔係明顯紅牌，祖漢杜蘭無意傷人，佢已經第1時間道歉，呢個判罰對球員嚟講太重。」