普斯迪高路要求增兵　意甲淪落人當寶

熱刺近期戰績沉淪，近5場聯賽輸4場後已跌落積分榜下半版，領隊普斯迪高路日前公開要求救亡，表明1月轉會窗一定要增兵，據報熱刺睇中愛華頓棄將賓葛菲特。

熱刺目前傷兵滿營，中堅基斯甸羅美路、雲迪雲同門將古里莫維卡里奧受傷後，失球數字大增，普斯迪高路表示：「我哋喺幾個位置都人手不足，有需要增兵，球會已經計劃緊，1月買人係好有挑戰性，但我哋同所有球會一樣，都想增強球隊實力。」

據英國《天空體育》報道，熱刺睇中今夏由愛華頓轉投阿特蘭大嘅中堅賓葛菲特，呢位26歲英格蘭球星登陸意甲後，發展不似預期，今季聯賽只係後備上陣踢過22分鐘，消息指熱刺打算提出借用，相信阿特蘭大亦會樂意放人。