意甲助攻王合約曝光　阿仙奴等收錢

拉素今季表現有驚喜，季前增兵成功係關鍵之一，佢哋喺夏天向阿仙奴借用葡萄牙左閘紐奴泰華利斯就係最佳例子，呢位24歲球星今季有8次助攻成為意甲助攻王，早前更入選埋葡萄牙國家隊，表現大受好評。

據報拉素喺今季完結後，會強制性用760萬鎊收購紐奴泰華利斯，唔少球迷都認為阿仙奴「走寶」，不過《都靈體育報》最近爆料，指拉素能夠平買紐奴泰華利斯，因為佢哋接納一條罕見條款，將來拉素出售紐奴泰華利斯，當中高達40%轉會費會落入阿仙奴袋中。

拉素會長洛迪度日前表示：「冇7,000萬歐元轉會費，我都唔會賣走紐奴泰華利斯，我哋搶贏好多競爭者先簽到佢，依家大家都知道佢有幾犀利。」紐奴泰華利斯3年前加盟阿仙奴嗰陣，表現被指唔成熟，不過阿仙奴相信佢經磨練後會爆發，所以加入超高「轉會分成」條款等收錢，如果拉素真係7,000萬歐元賣走紐奴泰華利斯，阿仙奴可袋2,800萬歐元。