艾摩廉打定輸數　承認有可能被炒

曼聯各項賽事3連敗，現時僅排英超14位，被英國傳媒指係近50年最差嘅紅魔鬼，剛上任一個月嘅領隊魯賓艾摩廉備受壓力，佢承認自己就算被炒魷都唔出奇。

魯賓艾摩廉同曼聯簽約至2027年，但佢認為現今球壇，任何領隊都有機會被提早解約：「曼聯領隊唔易做，我亦明白行業性質，如果曼聯贏唔到波，無論球會要支付幾多解約金，都會選擇解僱領隊，但我唔介意，因為我喜歡接受挑戰。」呢位39歲葡萄牙少帥同時指出執教曼聯以來，訓練時間不足，導致成績欠佳，但現實如此，只能接受。

另外，魯賓艾摩廉大讚中堅哈利馬古尼，認為呢位英格蘭國腳從來唔會為失敗搵藉口。