拿達路打破入球荒　國際米蘭大勝創57年紀錄

周日(29日)凌晨意甲，國際米蘭作客大勝卡利亞里3比0，前鋒拿達路馬天尼斯射入1球，打破近2個月球會賽事入球荒。由於榜首阿特蘭大和波失分，國米追至只落後1分，兼踢少1場，重奪爭標主動權。

兩隊實力有一段距離，上季意甲冠軍國際米蘭控制大局，全場有20次射門，對手只有5次。不過，國米上半場浪費唔少機會，要等到換邊後，先至打開紀錄，尼高路巴列拿大腳傳中，由中堅巴斯東尼頂入。

尼高路巴列拿之後再次貢獻助攻，同樣右路傳中，由拿達路馬天尼斯近門射入，呢位27歲阿根廷國腳自11月初對威尼斯建功後，相隔近2個月終於再次為國米入波。

雖然拿達路馬天尼斯打破入球荒，但整體表現未如理想，6次射門只入1球，並且曾經錯失空門入波機會，呢位上季意甲神射手得主仍未重拾最佳狀態。

其後卡利亞里球員喺禁區內犯手球，被吹罰12碼，查漢奴古主射入網，贈卡利亞里3蛋，國際米蘭自從1966/67年球季之後，再次做出聯賽作客5連勝兼不失球。