阿特蘭大聯賽11連勝斷纜　想借基艾沙爭標

周日(29日)凌晨意甲，榜首阿特蘭大作客戰至88分鐘入波，驚險逼和拉素1比1，聯賽11連勝走勢斷纜，僅領先國際米蘭1分，兼踢多對方1場，隨時可能失去一哥位置，教練加斯柏連尼有意下月轉會市場重開後增兵，提升爭標本錢，盛傳想借用利物浦翼鋒費達歷高基艾沙。

排第4位嘅拉素為搶分爭標，上半場踢法非常進取，頻頻起腳攻門，包括中場古安杜斯遠射中柱彈出。戰至27分鐘，迪利巴斯魯單刀射入，為拉素打開紀錄。換邊之後，阿特蘭大搶番唔少攻勢，最終靠後備上陣嘅布列斯安利尼射入扳平1比1。

今季意甲爭標形勢非常激烈，前4位球隊分數接近，賽後阿特蘭大主帥加斯柏連尼認為有需要加強人腳陣容，提升競爭力。意大利傳媒指阿特蘭大打算下月借用費達歷高基艾沙，呢位27歲意大利國腳今夏由祖雲達斯轉投利物浦，因為傷病問題，僅上陣4次，合共只踢咗123分鐘，成為「冗員」，紅軍唔介意外借佢。

據悉國際米蘭、拿玻里都有意借用基艾沙，意味意甲前3位球隊唔只爭標，仲鬥搶人才。