幫阿迪達打江山　卡索拉暗示回巢阿仙奴

阿仙奴日前喺英超1比0贏葉士域治，酋長球場有稀客到臨，西班牙中場辛迪卡索拉專程為死黨阿迪達打氣，呢位40歲球星更放風樂意回歸阿仙奴，傳聞可能出任教練或青訓等工作。

曾喺2012年至2018年效力阿仙奴嘅卡索拉，依家效力西乙嘅奧維多，明年夏天約滿後將考慮掛靴，盛傳佢會重返阿仙奴。卡索拉表示：「當然樂意(回巢)！阿仙奴係我屋企，我愛呢間球會同呢度嘅人，即管睇下點。我唔知可以做咩崗位，但我肯定會做同足球有關嘅嘢。」

卡索拉同阿迪達做過4年隊友，佢指阿迪達係佢足球場最好朋友之一，兩家人經常聚會。阿仙奴U18教練韋舒亞喺10月份離隊，球會只係提升助教布查爾接管，有傳卡索拉有機會回巢擔任U18主教練職位。