帮阿迪达打江山　卡索拉暗示回巢阿仙奴

阿仙奴日前喺英超1比0赢叶士域治，酋长球场有稀客到临，西班牙中场辛迪卡索拉专程为死党阿迪达打气，呢位40岁球星更放风乐意回归阿仙奴，传闻可能出任教练或青训等工作。

曾喺2012年至2018年效力阿仙奴嘅卡索拉，依家效力西乙嘅奥维多，明年夏天约满后将考虑挂靴，盛传佢会重返阿仙奴。卡索拉表示：“当然乐意(回巢)！阿仙奴系我屋企，我爱呢间球会同呢度嘅人，即管睇下点。我唔知可以做咩岗位，但我肯定会做同足球有关嘅嘢。”

卡索拉同阿迪达做过4年队友，佢指阿迪达系佢足球场最好朋友之一，两家人经常聚会。阿仙奴U18教练韦舒亚喺10月份离队，球会只系提升助教布查尔接管，有传卡索拉有机会回巢担任U18主教练职位。