艾摩廉針對最弱位置　曼聯冬季第一簽係佢

曼聯由魯賓艾摩廉接手領軍後，成績仍然冇起色，呢位葡萄牙少帥慣用343或3421陣式，對於左右翼衞球員要求非常高，但左閘勞基梳爾長期養傷，導致艾摩廉未能發揮戰術最大威力，計劃下月轉會市場重開後，率先簽入左翼衞，並睇中巴黎聖日耳門(PSG)「帶刀侍衞」紐奴文迪斯。

魯賓艾摩廉近期試用達洛治、杜維爾馬拉西亞踢左翼衞，但效果都未如理想，上場狼隊，杜維爾馬拉西亞更加被踢出大軍名單，恐怕呢位25歲荷蘭國腳前途唔樂觀。根據法國媒體《RMC Sport》爆料，曼聯計劃簽入PSG左閘紐奴文迪斯，呢位22歲葡萄牙新星只剩下1年半合約，但續約問題上遇到阻滯，PSG唔排除提早下月出售佢，紅魔鬼想趁機接貨。

值得一提，紐奴文迪斯出身於士砵亭青年軍，並於2020至22年為一隊效力，同當時士砵亭教練魯賓艾摩廉合作過，艾帥非常了解對方能力，因而想招攬呢位同胞。