紐卡素睇中卡維特利雲　為賣伊沙克鋪路？

根據英國《太陽報》爆料，紐卡素睇中愛華頓前鋒卡維特利雲，並計劃等呢位27歲英格蘭射手明夏滿約後，免轉會費簽入佢，似乎準備為高價出售前鋒阿歷山大伊沙克，搵定接班人。

卡維特利雲已經效力愛華頓10年，最威水係2020/21年球季，上陣33場英超入16球，但之後無以為繼，近4季入波都係單位數，包括今季聯賽17次披甲僅入2球，預料愛華頓無意同卡維特利雲續約。

由於卡維特利雲只剩下半年合約，下月1號開始可以同其他球會傾加盟事宜，紐卡素準備以高薪合約利誘佢明夏自由身加盟。

紐卡素射手阿歷山大伊沙克獲得阿仙奴、車路士、巴黎聖日耳門等大球會垂青，英國《電訊報》指會方要求1.5億鎊(約14.6億港元)轉會費，試圖嚇退買家，但呢位25歲瑞典國腳可能想轉投豪門，爭取事業更上一層樓，離隊機會仍然存在，難怪「喜鵲」搵定卡維特利雲，以備不時之需。

此外，意甲球隊費倫天拿亦想簽卡維特利雲，紐卡素唔一定可以簽到佢。